لحظة سمر !

الحب في قلبي غمر
يوم ما ابتدى
صوت الحبيب
يعلى ويعلى
والقدر
حالف لـ اعيش اعمى البصر
حالف م افرح يوم واشوفه
والقمر
شايف عيوني دبلانين
واشكي لمين
اصل التعاسة عالجبين
شيء اتحفر
وبرغم اني طير حزين
ولإني معجون بالحنين
صبري غَفَر
وحلمت يوم إنك هتيجي وتنصفي
وقولت استنّـىَ القمر
وعشان انا قلبي حِفي
والحلم جوايا انغدر
كَسَّر خطاوي الحب في قلبي الوفي
موّت بذور الشوق قبل ما تنبدَر
قلبي انا
كان ارض خصبه
وطلح حبي مُعتبَر
لكن حصادي السنا اااا دي في الهوى
ضاع واندثر
لما الاقي كل نبته بتكتمل
وبتحتفل
يوم الربيع
واما الاقي كل مهره جنبها مهر وديع
واما الاقي الشجرة مالت تنحني
وبنفسها ناوية تبيع
ومفيش شموخ ومفيش غرور
توهب ثمرها ونبتها واللي لها
لـَ جل الصخور
علشان تلاقي ودهم
لحظة عطشها وترتوي
من أرض بور
يمكن مفيش نقطة مطر
يمكن جوف الصخر / جَبَر
لكن تحس بالوفا
لما تلاقي الصخر يحضن في الجذور
وتلاقي قلب الشجرة ينبض بالدفا
وبتترسم بسمة خجل فوق الصخور
ونا صخرتي تبعد بعيد
وفـ حضنها عايش وحيد
مَهو اصلي مخلوق للجمود
مَهو اصلي محبوس في الحدود
مهو اصلي شجرة نوع فريد
مكتوب عليا الحزن يطرح ع الخدود
وتلاقي ملمع دمعتي فـ عنيا سود
وفـ يوم ونا ع الارض فارش جتتي
اصلي خلاص
بدبل ونشفت طلحتي
القا نسيمها
عدا عليا برقته
صحى فـ قلبي الموت
ولقيته سايب عشته
يجري بعيد
وظلام فـ قلبي بينطفي
واسمع كلامها اصطفي
والكل يسكت
دا الحب هيقول كلمته
والنبض هيعود للحياة
والحزن لامم هدمته
والفرح ماسك طبلته
والجو مليان بالسمر
واستنى اشوفها وللأسف
قمر الليالي انكسف
وحلف يضلم عندنا
ورجعت من تاني ضرير
سامع خطاوي دمعتي
والبير بيصرخ
اتمليت
تاهت معالم سكتي
ونا قلبي ينده
انتهيت
وبقيت خلاص حبة حطب
مين يشتري يا حطابين
مين يشتري
لحظة سمر
الموضوع منقول ياجماعه