لمحت لحمه فى محل زحمه ما بين صغير وبين كبير
لقيت فيه هيصه وحاجات رخيصه ممبار وكرشه وكباب خطير
انا قلت اجيلوا واخطفلى كيلو والاغيه فى فشه وطحال كتير
ما انا اصلى غاوى اكل العكاوى واحب اشوطها بس بضمير
وان كان فيه ليه ااقول للوليه تقلى بيها تديك عبير
ولجلن يكفى اتنين مشفى احمر ملبس بسكين حرير
وانا برضه راضى رجعلى ماضى مارجعش فاضى جزار شهير
بفلوس قليله وكلمات جميله ارجع وشايل الخير كتير
سنين طويله يجى الف ليله ما يوم يعدى من غير ده خير
والاشيا ماشيه والكبده زبده واللحمه حلوه كندوز صغير
جيت مره بشهق لقيتنى بانهق وودانى كبرت وصوت جعير
اصبحت قدوه فى لبس حدوه من اى سيسى بقيت بغير
ويوم ما بدعى القى البرادعى يجبلى سرج ولجام واطير
ساعة مابعطش ارفص وابرطش واحط بوزى فى اى زير
كان اسمى صاوى بقيت حصاوى فى اصطبل عنترقاعد اسير
كبرت ودانى طولت سنانى وكروشنا كبرت مالهاش نظير
اثناء غيابى غابت كلابى قعدت اهوهو لعله خير
وفى يوم معدى وماحد قدى لقيت فيه لمه وناس كتير
وبرضه زحمه فى محل لحمه ولاجل ما اعرف اسال خبير
لقيت غضنفر واقف بينفر فى ايده مطوه وبصوت زئير
وياريت مارحت وسالت عنه طلع صاحبنا جزار جمير
بجد خير مثال لحياتنا الجميله الى احنا عايشنها من جريدة المصرى اليوم